La Cène
Chers amiz et freres humains,
Entretenez fraternité
En vraye et ferme charité ;
Ne portez courroux ne rancune,
Et s’il advient par chose aucune
Que discencion s’i esmeuve,
La crainte de Dieu vous promeuve
A vostre prochain ordonner
Si que tout veilliez pardonner ;
Car qui n’ara a son prochain
Charité, sache de certain
Que Dieu ne luy pardonnera,
Ne de son mal pardon n’ara.
Paix soit toute vostre possesse,
Paix soit toute vostre richesse
Paix est ung tresor et avoir
Que meilleur ne pouez avoir ;
Et sur quancque je vous commande,
Charité je vous recommande :
Se de celle vous vous armez,
Vrais filz de Dieu estes clamés ;
Par charité pouez merir,
Sans elle ouvrer n’est que perir.
Arnoul GRÉBAN,
Le mystère de la Passion, vers 1450.