Cantique spirituel
Penser à la passion
De Jésus Christ
C’est la consolation
De mon esprit.
Seigneur quand viendra le jour
Tant desiré,
Que je seray par amour
A vous tiré
Et que l’union sera
Telle entre nous,
Que l’espouse on nommera
Comme l’espoux.
Penser à la passion...
Ce jour des nopces, Seigneur,
Me tarde tant,
Que de nul bien ni honneur
Ne suis content.
Du monde ne puis avoir
Plaisir ni bien
Quand je ne vous y puis voir,
Las ! je n’ay rien.
Penser à la passion...
Si de vostre bouche puis
Estre baizé,
Je seray de tous ennuis
Tout appaisé.
Baisez moy, accolez moy,
mon Tout en tous,
Unissez moy par la Foy
Du tout à vous.
Penser à la passion.
Essuyez mes tristes yeux
Du long gemir,
Si me donnez pour mon mieux
Un doux dormir.
Car d’ouyr incessamment
Vos saincts propos,
C’est parfait contentement
Et seur repos.
Penser à la passion...
MARGUERITE DE NAVARRE.